يا هُبَلْ إِسْمَكْ يِضَحَّكْ.. قصيدة جديدة لتميم البرغوثي

رام الله - وطن: أطلق الشاعر الفلسطيني الشاب تميم البرغوثي قصيدة جديدة باللهجة المصرية، ينتقد فيها الواقع المصري الحالي.

فيما يأتي نص القصيدة التي نُشرت في صحيفة "الشروق" المصرية:

يا هُبَلْ إسمَكْ يِضَحَّكْ

برضه بعض الآلهة بتبقى سخيفةْ

مْتَبِّتَة قَوِي فِي الوَظِيفَةْ

بَسِّ رَافْضَة تِشْتَغَلْ

شُوفْ أَكْل عِيشَكْ يَا هُبَلْ

قَاعِدْ تقول اْدعوني أدِّيلكم أماني

بس لما تيجوا تدعوا صفَّروا لاجل اْنْتِبِه وَاْفْتَح وِدَانِى

وادبحولي كام جَمَلْ

آدي الجمل وادي الحَمَلْ

يا سيِّدي اتلحلح بقى وِاْشْفِي لْنَا مَكْسُورْ أو عليلْ

أو جرَّب انصرنا على الجيش الدخيلْ

يا عمِّ دول جايين بفيلْ

طَبْ بُص، خَلِّيك اْنْتَ راكن بَسِّ قُول إيه العَمَلْ

واللي اتخَدَعْ لما اتَّبَعْ ضرب الوَدَعْ، عَايِزْ بَدِيلْ

•••

بعدين يا بيه والله ماحناش مُعْجَبين بالابتزاز المُسْتَمِرِّ بْتاع سيادتكْ

تِبْقَى أُم وْخَايْفَة يِتْصاب ابنَها في الحرب، تفضل تدعى وتموت نَهْنَهةْ

وِتْبُوس جِزَم كُهَّان سيادتك لاْجْل تحمى لها ابنَها

فيموت، فتزعل، هية لسَّة يادوب هاتِتْنَرْفِزْ وتِكْفَر بيكْ

تِمَرَّضْ ابْنَها التاني، فَتِرجَعْ لَكْ تِبُوسْ رِجْلِيكْ

عَبِيدَكْ مَهما تخذلهم بِيِفْضَل عندهم حاجة تِهَدِّدها فيرضوا عليك

وِيِحتَاجُوا

وإن هاجوا وإن ماجوا

ماْسكهم كالسَّمَكْ في إيديك وِفِى إيديك الشَّبَكْ

عايش على الخوف والأملْ

شوف أكل عيشك يا هبلْ

واعرف مَصالْحَكْ

•••

يا هبل والكارثة إنك مُستَفِيدْ

من كافِّةِ الناسْ والعَبِيدْ

حتَّى اللي طَلْعَانْ رُوحُهْ مِنَّكْ واللي نَازِلْ يِشْتِمَكْ

مَاْهُو لَمَّاْ يِكْفَر بِيك عَشَانْ مَقْمُوص،

عشان عايز يِعاقْبَكْ أَو يِغِيظَكْ

أَوْ عَشَانْ تِزْعَلْ،

دَه مَعْنَاهِ انُّه مُؤْمِنْ بِيكْ وِبِوْجُودَكْ

فيصبح كُفْرُه إِيمَانُه وِنَفْيَكْ يِبْقَى تأكيدَكْ

سَمَكْ، فعلاً سَمَكْ

والبَحْرِ صَفْحَة مْكَرْمِشَة فْ إِيدَكْ

يا مُنْشار واخِدِ الإيمان كِدَه طَالِعْ وِنَازِلْ

مؤمنة بيك القبائلْ

ثَعْلَبَةْ وْتَغْلِبْ وِوَائِلْ

كُلِّ تَاجِر لُه قَوَافِلْ

كلِّ سَارِقْ كُلِّ قَاتِلْ

حَط فِي خزنة سَعَادْتَكْ دِرْهَمِينْ

يِبْقَى خِلِى مِنْ كُلِّ شِينْ

وِالوَالِدِينْ يِبْكُوا اللَّيالِي عَ الوَلِيدِ اللي اْتْقَتَلْ

شُوفْ أَكْلِ عِيشَكْ يَا هُبَلْ

وِاْعْرَفْ مَصَالْحَكْ

•••

يا هُبَلْ والكاْرْثَة كُهَّانَكْ بِيِشْتَغَلُوكْ

أكيد هُمَّ اللي سَمُّوكْ، بِاسْمَكِ التُّحفَة مَاْ بِينِ الآلِهَة

لازم مُؤامرة أو مُغَامْرَة مِن وَلَدْ كَاهِنْ صُغَيَّرْ

شَكْلُه كَانْ فَاقْسَكْ وِكَان حَابِبْ يِهَزَّرْ

يا هُبَلْ وده إسم ده ينفع فِي صُحبة آلهة وِمْلُوكْ؟!

أَكِيدْ بَدَلُوكْ

وِغَشُّوكْ فِي البَدَلْ

بعدين ياْ عَمِّى بْيِسْتَغِلُّوك مِنْ وَرَاكْ

اللحْمَة يَاْكْلُوها وْكَمَانِ الكِسْوَة يَاْخْدُوها

وْفُلُوسْ مَلايينْ، مِن القَرَابِينْ

بنوا بيها قصور عَالْيَة وَسَاْبُوكْ قَاعِدْ إله مِنْ طينْ

وَلَكِنْ سَاعِة الأزمةْ

على هُودَجْ حَدِيدْ يِشِيلُوكْ

وتِتِشَحْطَطْ وِتِتْبَهْدِلْ بِلا لازمةْ

يروحوا يِقْتِلُوا بْإِسْمَكْ أُمَمْ

وِيْحُطُّوا صُورْتَكْ عَ العَلَمْ

وِاْنْتَ تِجِي لَكْ بِالبَكَمْ

مَا هَا اْقُوْلْ لَكِ إيه! وَاحِدْ صَنَمْ!

وِمَعَارِكْ الكُهَّان لِصَالْحَكْ

حتى لو كُهَّانْ قُلَلْ

شوف أكل عيشك يا هُبَلْ

وِاْعْرَفْ مَصَالْحَكْ

•••

يا هُبَلْ خُدْنِي بِجِدِّيَّة دَه مِشْ تَهْرِيجْ

وِإنْتَ فْ وَضْعِ مِشْ وَلابُدّ

حيث إنت الوحيد في الدُّنْيَاْ دِي مَسْموح لي شَرْعَاً إني أَلْعَنْ دِينَكِ، اْسْمَعْ

لُولا بَسِّ اْنِّ اْحْنَا عالم طَيِّبَة بْتِصْعَبْ علينا العشرة حتى واحنا مش طَاْيْقِينَكِ،اْسْمَعْ

فاكر اَمَّا كُنْت لِسَّه إِله صُغَيَّرْ

يِنحتوك عَيِّلْ صُباعُه فْ بُقُّه أو قاعد بِيِرْضَعْ

لسة فِكْرَة فْ قَلْبِ كَاهِنْ

كَان مِراهِنْ

إنُّه بَعْضِ الكِذْبِ يِنْفَعْ

وِانُّه لَوْ صَنَّع مَلِكْ لِلآلهةْ مْلُوكِ البَشَرْ يِمْكِنْ هَتِخْضَعْ

وانِّ بَعْضِ النَّاسْ إذا مَا صَدَّقُوا اْنِّ الدنيا فيها عَدْلِ مُمْكِن يِعْدلوا

وإنه حنين البدو للأسلاف وللمَيَّة،

يِخَلِّيهم يِحِبُّوا اْنُّه يِكُونْ لَكْ لِحْيَةْ مَفْتُولَة وْمِحَنِّية

وِوَاْصْلَة لْنُصِّ صِدْرَكْ وِانه تِبْقَى إِلَه مَطَرْ طَيِّبْ، قُرَيِّبْ،

لما ترضى الدنيا تِشْتِي وَاْمَّا تِغْضَبْ يِبْقَى آخْرَكْ غِيمْ وِرَعْدْ؟

فَاكِرَ اَمَّا كُنْت وَعْدْ؟

قَبْلِ مَا النَّاسْ يِطْلَعُوا بِيكِ السَّلالِمْ

شَعْبِ مُسْتَيْئِسْ وِحَالِمْ

يِرْفَعُوكْ عَ العَرْشِ بَعْدِينْ يِنْزِلُوا

تِبْقَى اْنْتَ قِمِّتْهُم ويبقوا هُمَّه سَفْحَكْ

والضَّحايا مْغَطِّيَة نُصِّ الجَبَلْ

شُوفْ أَكْل عِيشَكْ يَا هُبَلْ

واعرف مصالحك

•••

القطط عند الولادة في العلب متكوَّرة

والآلهة بتبقي لطيفة وهي لسة صغيَّرة

ليها اتجاه ثوري ومعناها مُجَرَّدْ

إنما أول ما تُعْبَدْ،

والمعاني بالحَجَرْ الَاْطْرَشْ تُجَسَّدْ

والتماثيل هِيَّه رُخْرَة يِحْبِسُوها جُوَّة مَعْبَدْ

وِالمَعَابِدْ يِدْخُلُوهَا بِالأَضَاحِي وِالتَّذَاكِرْ

والعَقِيدَة يِفْرِضُوها وْيُحْرُسُوها بِالعَسَاكِرْ

حاجة من روح الإله تِهْرَبْ وِتِتْسَحَّبْ مِنِ التِّمْثَالْ

وِيِرْضَى يِتْشِرِي بِالمَالْ

وِيِتْخَنْ يِبْقَى قَدِّ القِدْرَة مِن كُتْرِ الأَضَاحِي

لَوْ قَطِيعْ أَفْيالْ يِجِيلُه يَاْكْلُه صَاحِي

ياهُبَلْ ارْجَعْ صُغَيَّرْ، لَوْ إِلَهْ، ارْجَعْ صُغَيَّرْ

وِاْسْتَقِيلْ

مِنْ شُغْلَكِ الصَّعْبِ التِّقِيلْ

دِي القَعْدَة فِي المعبد يَاْ راجل حاجة في غَاْيْةِ المَلَلْ

شُوفْ أَكْل عِيشَكْ يَا هُبَلْ

واعرف مصالحك

•••

طب وهاترجَّعنا لما نْمُوتْ بَقَى والا اْنْتَ نَاوِي تْطَّنش العالم كمان؟

مالروم أَهُمْ بيقلولوا ناويين يرجعوا من بعدِ مَاْ يْمُوتُوا

وفيه واحد هنا بيقول هَايِكْفَرْ بِيكْ، وِبِيدَوَّرْ عَلَى رَبُّه

يِكُونْ يِسْمَعْ لُه وِيْحِبُّه

وِمِشْ بَرْضُه اْنْتَ لِيكْ كِدَه جُوزْ وِدَانْ؟

فَبَقُولْ لَك إيه، مَا تْجِيبْ جِهَازْ هَاتِفْ

وِتُنْشُر نِمْرِتُه، أَوْ نِنْتِخِبْ لَكْ بَرْلَمَانْ

شوف يا إله العجوة يا فرحان قوى بْاسْمَكْ وِشَكْلَكْ

يا حُمَار النَّاسْ دِي لَوْ جاعت ها تاْكْلَكْ!!

والاّ اَقُول لك،

إحنا ممكن نِمْشِي وِنْسِيبَكْ بَقَى تُحْكُمْ عَلَى اللاشيء

على الريح اللي بِتْصَفَّر وِتِتْسَنْفَر بِهَا الوِدْيَانْ، وِنِرقَعْ في البيبانْ

وِاْبْقَى اْنْتَ بالشَّعْرِ اللي يِشْبِه لِلِّحَافْ

وِرْقَبْتَكِ اللي غَاْطْسَة مَا بِينِ الكِتَافْ

وِقَوَايْمَكِ العَجْوَة اْطْلَعِ اْجْرِي وَرَانا وِابْقَى عَبْدِ وَيَّانَا

وِفَتِّشْ عَنْ سَمَا تعَلَّقْ عَلِيها الخُوفْ

وِتُنْقُشْهَا رُسُومْ وِحْرُوفْ

وِشُوفْ لَك عِيلَة تِخْشَى عَلِيهَا مِ الأَزْمَانْ

يَاْ رَبِّ، يَاْ مَانْ

عَشَانْ نِعْرَفْ نِصَاْلْحَكْ

يَا هُبَلْ عَاْيْزِينْ نِسَاْمْحَكْ

•••

يَا هُبَلْ والله لِينَا مَصْلَحَة فْ إِنَّ اْحْنَا نُؤْمِنْ بِيكْ وِنِرْضَى

بَسِّ مِشْ عَاْرْفِينْ

لإنُّه الدَّمِّ مِشْ مِدِّينَا خَالِصْ فُرْصَةْ نِفْضَى

ثُمِّ إِنَّ المُشْكِلَةْ

إِنِّ اْنْتَ بَرْضُه مَهْمَا تِعْمِلْ فِينَا وِتْبَكِّي عِينِينَا

يَا هُبَلْ

إِسْمَكْ يِضَحَّكْ